ठाणे महापालिकेतील सफाई कर्मचाऱ्यांना वारसाहक्काने नियुक्तीचे आदेश निर्गमित

ठाणे महापालिकेतील सफाई कर्मचाऱ्यांना वारसा हक्काने नियुक्तीचे आदेश निर्गमित उपमुख्यमंत्री एकनाथ शिंदे व खासदार नरेश म्हस्के यांच्या पाठपुराव्याला यश सफाई कर्मचाऱ्यांमध्ये आनंदाचे वातावरणठाणे- ठाणे महापालिकेतून सेवानिवृत्त, स्वेच्छानिवृत्त तसेच मयत झालेल्या सफाई कामगारांच्या वारसाहक्काने महापालिकेच्या सेवेत येणाऱ्या 15 जणांचे नियुक्ती आदेश आज प्रशासनाने निर्गमित केल्याने सर्व सफाई कर्मचाऱ्यांमध्ये आनंदाचे वातावरण पसरले आहे. सफाई कर्मचाऱ्यांच्या वारसांना वारसा हक्क लागू व्हावा यासाठी उपमुख्यमंत्री एकनाथ शिंदे व खासदार नरेश म्हस्के यांनी शासनाकडे वारंवार पाठपुरावा केला होता. या पाठपुराव्याला यश आले असून सफाई कर्मचाऱ्यांच्या वारसांना वारसा हक्क मिळण्याचा मार्ग आता मोकळा झाला असून प्रलंबित वारसा हक्काच्या नियुक्ती तातडीने कराव्यात असे निर्देश खासदार नरेश म्हस्के यांनी प्रशासनाला दिले आहेत. ठाणे महापालिकेतील जे सफाई कर्मचारी सेवानिवृत्त, मयत वा ज्यांनी स्वेच्छा निवृत्ती घेतली आहे, अशा कर्मचाऱ्यांच्या वारसांना लाड- पागे समितीच्या शिफारसीनुसार वारसा हक्क लागू होतो, त्या अन्वये त्यांना महापालिकेच्या आस्थापनेवर सफाई कर्मचारी या संवर्गात नियुक्तीची तरतूद आहे. या बाबत सर्व सफाई कर्मचारी यांना वारसा हक्क देण्याबाबत या माहे फेब्रुवारी 2024 च्या शासन निर्णयास मा. उच्च न्यायालय औरंगाबाद खंडपीठ येथे आव्हानित करण्यात आले होते.

या रिट याचिकेमध्ये 8 जानेवारी 2025 मध्ये जे स्थगिती आदेश आहेत ते मा. उच्च न्यायालयाने उठवून वारसा हक्काने सर्व सफाई कर्मचाऱ्यांच्या वारसांना नियुक्ती आदेश देणेबाबत शासनाने निर्देश दिले होते. या निर्णयाच्या अनुषंगाने सामाजिक न्याय व वित्त मंत्रालयाने यांनी जानेवारी 2025 अखेरीस सर्व सफाई कर्मचाऱ्यांच्य वारसांना नियुक्ती आदेश देणेबाबत आदेश दिले आहेत. याबाबत उपमुख्यमंत्री एकनाथ शिंदे व खासदार नरेश म्हस्के यांनी सातत्याने पाठपुरावा केल्यामुळे शासनस्तरावरुन सफाई कर्मचाऱ्यांना वारसा हक्काने नियुक्ती देण्याचा मार्ग मोकळा झाला.

याबाबत आयुक्त सौरभ राव यांच्या मार्गदर्शनानुसार ठाणे महापालिका प्रशासनाने विशेष मोहिम राबवून महापालिकेतील जे सफाई कर्मचारी सेवा निवृत्त, स्वेच्छा निवृत्ती तसेच मयत झाले आहे अशा सफाई कर्मचाऱ्यांच्या 15 वारसांचे आदेश प्रशासनाकडून निर्गमित करण्यात आले. तसेच टप्प्याटप्प्याने उर्वरित सफाई कर्मचाऱ्यांच्या वारसांचे देखील नियु्क्तीचे प्रशासनाकडून लवकरच आदेश काढण्यात येणार आहे. आज झालेल्या सफाई कर्मचाऱ्यांच्या वारसाच्या नियुक्तीमुळे सर्व कर्मचाऱ्यांमध्ये आनंदाचे वातावरण असून त्यांनी उपमख्यमंत्री एकनाथ शिंदे, खासदार नरेश म्हस्के, महापालिका आयुक्त सौरभ राव व प्रशासनाचे आभार व्यक्त केले आहेत.