पलावा सिटीजवळील देसाई खाडीत सुटकेसमध्ये महिलेचा मृतदेह
ठाणे, प्रतिनिधी डायघर पोलीस ठाण्याच्या हद्दीतील पलावा सिटीजवळ असलेल्या देसाई खाडीत ३० वर्षीय महिलेचा मृतदेह एका सुटकेसमध्ये आढळला. दुपारच्या सुमारास खाडीच्या पुलावरून जाणाऱ्या पादचाऱ्यांना मृतदेह निदर्शनास आला. या घटनेने संपूर्ण परिसरात एकच खळबळ उडाली असून डायघर पोलिस अधिक तपास करत आहेत.
देसाई खाडी पुलाच्याखाली निर्जनस्थळी एका सुटकेसच्या बाहेर महिलेचा मृतदेह दिसत होता. या महिलेचा मृतदेह अत्यंत कुजलेल्या अवस्थेत होता. या महिलेची ओळख अद्याप पटलेली नसून पोलीस या घटनेचा शोध घेत आहेत. घटनेची माहिती मिळाल्यानंतर घटनास्थळी डायघर पोलिस ठाण्याचे पोलिस पथक, क्राइम ब्राच, फॉरेन्सिक पथकासह दाखल झाले. पोलिसांनी पंचनामा करून मृतदेह ठाण्याच्या कळवा येथील छत्रपती शिवाजी महाराज रूग्णालयात शवविच्छेदनासाठी पाठवला आहे. दरम्यान, मृत महिलेची ओळख पटवण्यात येत असल्याचे पोलिसांनी सांगितले.
