स्वस्तात दुचाकी देण्याचे प्रलोभन दाखवुन केमिस्टला लाखोंचा गंडाधुळ्यातील दुकलीचा फसवणुकीचा नवा फंडा ठाणे
प्रतिनिधी स्वस्तात नऊ दुचाकी देण्याचे प्रलोभन दाखवुन सिंदखेडा, धुळे येथील दुकलीने ठाण्यातील केमिस्ट दुकानदाराला तब्बल साडेपाच लाखांचा गंडा घातल्याचा प्रकार उघडकीस आला आहे. या प्रकरणी वागळे इस्टेट पोलिसांनी ज्ञानेश्वर सखाराम कोळी (४०) आणि दिनेश अंनत पाटील,(४३) या दोघांना अटक केली असुन त्यांच्याकडून सात दुचाकी हस्तगत केल्या आहेत. अटकेतील भामट्या दुकलीला ठाणे न्यायालयाने एक दिवसाची पोलीस कोठडी सुनावल्याची माहिती पोलीसांनी पत्रकार परिषदेत दिली. दरम्यान, नागरीकांनी अशा फसवणुकीला बळी पडु नये, असे आवाहन वरिष्ठ पोलीस निरीक्षक शिवाजी गवारे यांनी केले आहे.
वागळे इस्टेट, लुईसवाडी येथील स्वामी समर्थ मेडीकल दुकान चालवणारे संदीप दशरथ गलांडे यांना अवघ्या ६० हजारात दुचाकी देण्याचे प्रलोभन कोळी आणि पाटील या दुकलीने दाखवले होते. तसेच, काही दुचाकींची छायाचित्रेही व्हॉट्स ॲपवर पाठवुन एक महिन्यात आरटीओ ट्रान्सफर करून देणार असल्याचे सांगितले होते. या आमिषाला बळी पडुन गलांडे यांनी ९ दुचाकीकरिता ५ लाख ४० हजार रूपयांची रक्कम रोख व ऑनलाईन स्वरूपात या दुकलीला पाठवली.मात्र, दुचाकी न देता फसवणुक केल्याचे लक्षात येताच गलांडे यांनी वागळे इस्टेट पोलीस ठाण्यात तक्रार केली. मार्च – एप्रिल २०२३ साली घडलेल्या या प्रकाराची गंभीर दखल घेत पोलिसांनी याप्रकरणी फसवणुकीचा गुन्हा दुकलीवर दाखल केला.वरिष्ठ पोलीस निरीक्षक शिवाजी गवारे यांच्या मार्गदर्शनाखाली पोलीस उपनिरीक्षक ज्योतीराम भोसले यांच्या पथकाने धुळे सिंदखेडा या ठिकाणी, तांत्रिक पुराव्याच्या आधारे शोध घेत ०७ दुचाकीसह दुकलीला ताब्यात घेतले. चौकशीत त्यांनी पैशांची गरज असलेल्या इतर ०८ दुचाकी मालकांना बँकेचे कर्ज मंजुर करून देत, त्यांच्या दुचाकी स्वतःकडे ठेवुन फसवणुक केल्याचे तपासात निष्पन्न झाले.
