मराठी X परप्रांतिय वादाला फोडणीराज ठाकरेंना धमकावणाऱ्या दोघा परप्रांतियांना मनसे हिसकापोलिसांनी गुन्हा दाखल करताच परप्रांतियाची माफी.
ठाणे, प्रतिनिधी मुंबई, ठाण्यात मराठी विरुद्ध परप्रांतीय असा वाद उफाळलेला असताना ठाण्यातील गांधीनगर भागात दोघा परप्रांतीय रिक्षा चालकांनी थेट मनसेचे अध्यक्ष राज ठाकरे आणि अविनाश जाधव यांना धमकी दिली होती. या संदर्भाची चित्रफीत सोशल मिडियात व्हायरल होताच संतप्त महाराष्ट्र सैनिकांनी त्या रिक्षाचालकांचा शोध सुरू केला, तत्पुर्वीच पोलिसांनी त्यातील एका रिक्षा चालकाच्या मुसक्या आवळल्याने अनर्थ टळला. दरम्यान मनसैनिकांनी पोलीस ठाण्यात जाऊन चोप देत त्या रिक्षा चालकाला माफी मागावयास लावल्याचा दावा मनसे नेते अविनाश जाधव यांनी केला. तसेच, राज साहेबांबाबत बोलाल तर तुमचे हात पाय तोडू असा इशाराही दिला. ठाण्यातील पोखरण रोड येथील गांधीनगर भागात रविवारी रात्री शिवसेना शाखेजवळ दोन परप्रांतिय रिक्षाचालकांनी धिंगाणा घालत भर रस्त्यात शिवीगाळ केली होती. त्यांनी मनसेचे अध्यक्ष राज ठाकरे आणि मनसेचे नेते अविनाश जाधव यांच्याविषयी अपशब्द काढले. तसेच, मनसे पक्षाविषयीही आक्षेपार्ह वक्तव्य केले. या घटनेचे चित्रीकरण सोशल मिडियात व्हायरल झाले. याबाबतची माहिती मनसेच्या पदाधिकाऱ्यांना मिळाल्यानंतर त्यांनी रिक्षा चालकांचा शोध घेण्यास सुरुवात केली. परंतु त्यापूर्वीच यातील एका रिक्षा चालकाला पोलिसांनी ताब्यात घेऊन अटक केल्याने अनर्थ टळला.
या प्रकरणी मनसेचे उपविभाग अध्यक्ष रवींद्र महाले यांनी तक्रार दाखल केल्यानंतर रिक्षा चालक शैलेंद्र यादव (३५) आणि राकेश यादव (२७) दोघेही रा. कशेळी याच्या विरोधात चितळसर पोलीस ठाण्यात गुन्हा दाखल केला. यातील शैलेंद्र याला पोलिसांनी अटक केली आहे. तर राकेश याचा पोलीस शोध घेत आहेत. चौकट – रिक्षा चालकांनी अपशब्द वापरल्याने सकाळपासून आम्ही त्यांना शोधत होतो. त्याच्या घरापर्यंत पोहचलो. परंतु आम्ही पोहोचण्यापूर्वीच पोलिसांनी घरातुन त्याला अटक केली. चितळसर पोलीस ठाण्यात आणल्यानंतर महाराष्ट्र सैनिकांनी पोलीस ठाण्यामध्ये शिरुन त्याला चोप दिला. निवडणूका येतील जातील, महाराष्ट्रात माज दाखवू नका. राजसाहेबांबद्दल अपशब्द काढाल तर हात-पाय तोडल्याशिवाय आम्ही गप्प बसणार नाही. असा इशाराही जाधव यांनी दिला.
