ठाण्यात महायुतीला घरघर – शिवसेनेचा “अब की बार १०० पार” चा नाराएकुण जागा १३१ असताना शिंदे सेनेला १०० जागांची आसठाणे, प्रतिनिधी ठाणे महापालिकेची सार्वत्रिक निवडणुक राज्यात सत्तेत असलेल्या तिन्ही पक्षाचे नेते महायुतीमधुन लढण्याचे दावे करीत असताना ठाण्यात शिंदेंच्या शिवसेनेला १०० जागांची आस लागल्याने महायुतीला घरघर लागल्याची चिन्हे दिसत आहेत. शिवसेनेचा बालेकिल्ला असलेल्या ठाण्यात आगामी ठाणे पालिका निवडणुकीबाबत शिवसेना संपर्कप्रमुख ठाणे लोकसभेचे खासदार नरेश म्हस्के यांनी मोठे भाष्य केले आहे. खा. म्हस्के यांच्या उपस्थितीत ठाणे महापालिकेवर पुन्हा एकदा भगवा फडकवण्याचा निर्धार आज शिवसैनिकांनी केला. ठाण्यात शिवसेनेने “अब की बार १०० पार” चा नारा देत ठाण्यात शिवसेनेचाच महापौर विराजमान होईल असा विश्वास यावेळी शिवसैनिकांनी व्यक्त केला. ठाणे महापालिका निवडणुकीच्या पार्श्वभूमीवर भाजप शिवसेनेत वर्चस्वाचे दावे केले जात असुन फोडाफोडीनंतर सेना – भाजप एकमेकांशी हातघाईवर आल्याचे दिसुन आले. तरीही उभय पक्षाकडून निवडणुका महायुती म्हणुनच लढण्याची भाषा केली जात असते. भाजपकडून मंत्री गणेश नाईक, आ. संजय केळकर या धुरीणां पाठोपाठ भाजपचे माजी नगरसेवक नारायण पवार हे देखील शिंदे सेनेवर तुटुन पडत आहेत. अशा परिस्थितीत मुंबईत भाजपने १०० पार चा नारा दिल्यावर ठाण्यात शिवसेनेनेही तीच रि ओढली आहे. शिवसेनेचे मुख्य नेते उपमुख्यमंत्री एकनाथ शिंदे यांचे नगरपरिषद आणि नगरपालिका निवडणूकीसाठी राज्यभर दौरे, सभा सुरू असताना ठाणे महापालिकेवर एकहाती सत्ता काबीज करण्यासाठी शिवसेनेचे ठाण्यातील वरिष्ठ नेते, पदाधिकारी आणि कार्यकर्त्यांनी कंबर कसली आहे. शिवसेनेने दिवंगत जिल्हाप्रमुख धर्मवीर आनंद दिघे यांच्या टेंभी नाक्यावरील आनंद आश्रमात ठाण्यात शिंदेंच्या शिवसेनेच्या पदाधिकारी आणि माजी नगरसेवकांची बैठक आज पार पडली. या बैठकीत माजी नगरसेवक, पदाधिकारी आणि मोठ्या प्रमाणात इच्छुक उपस्थित होते. या बैठकीत अब की बार १०० पार असा नारा देण्यात आला.तसेच या बैठकीत अंतर्गत गटबाजी खपवुन घेणार नसल्याचा इशारा वरिष्ठ नेत्यांनी दिल्याची माहिती सूत्रांनी दिली.चौकट – १०० पार नाऱ्यामुळे महायुती धोक्यात ? एकीकडे भाजप आणि शिंदे गटात वाद सुरू असताना दुसरीकडे ठाणे महापालिका निवडणुकीत १०० नगरसेवक निवडून आणण्याचे टार्गेट शिवसैनिकानी ठेवले आहे. दरम्यान, पालिका निवडणुकीसाठी युतीचे घोंगडे भिजत असताना शिवसेनेच्या अब की बार १०० पार च्या नाऱ्याचे पडसाद काय उमटणार ? असा सवाल उपस्थित करण्यात येत आहे.
